දහයට පහයි..

රුපියල අරමලු
ආර්ථිකේ මෙහෙමලු
උද්ධමනේලු
අස්ථාවරලු
මොනවා උනත්
හැමදාම
කෝච්චියේ යනෙනකොට
ළූණු එක්ක මිරිස් එක්ක
දහයට පහයි
පරිප්පු වඩේ...

පාතාලේ සොල්දාදුවා

දුවන් එන අඩිහඬට
පෑල දොර විවර වෙන..
දුවන් එන පොඩි උන්ගේ
තකහනියේ හිස සිඹින..
එක අතක එල්ලෙනා
රස චිකන් කොත්තුව..
අනෙක් අතට වහංගුව
ගිනි නිවන බඩු කාල..
පසෙක උන් බිරින්දෑට
විඩාබර සිනාමුව..
වාඩිවෙන්න නැවෙනකොට
එළිබහින ඉටුදෙවියා..
බඩවියත රැකලා දෙන
ගිනි පිඹින ගල්කටස් එක...

කුවේණිගේ.....

අන්තරේ නසනවලු

පඩිපතත් කපනවලු

විදුලියත් කපයිලු

නියඟෙකුත් තියනවලු

මේ කචල් හෙන කේස්

හැමදෙයක් වෙන අස්සේ

අපේ උන්ට 

ලොකුම දේ

කුවේණිගේ ජංගියලු....